ಬಳ್ಳಾರಿ: ಭಾರತ–ಥೈಲೆಂಡ್ ಸಾಂಸ್ಕೃತಿಕ ಬಾಂಧವ್ಯವನ್ನು ಮತ್ತಷ್ಟು ಬಲಪಡಿಸುವ ಉದ್ದೇಶದಿಂದ ಥೈಲೆಂಡ್‌ನಲ್ಲಿ ಆಯೋಜಿಸಲಾದ ಭಾರತ–ಥೈಲೆಂಡ್ ಗ್ಲೋಬಲ್ ಯೋಗ ಫೆಸ್ಟಿವಲ್–2026ರಲ್ಲಿ ಬಳ್ಳಾರಿ ಜಿಲ್ಲೆಯ ಸಂಡೂರು ತಾಲ್ಲೂಕಿನ ಕುರೇಕುಪ್ಪ ಗ್ರಾಮದ ಯೋಗ ಶಿಕ್ಷಕ ಹಾಗೂ ವಿಶ್ವ ಯೋಗಿ ಪುರಸ್ಕೃತ ಎ. ರಾಘವೇಂದ್ರ ಅವರಿಗೆ ಪ್ರತಿಷ್ಠಿತ 'ಯೋಗ ವಾಹಕ' ಪ್ರಶಸ್ತಿ ಪ್ರದಾನ ಮಾಡಲಾಯಿತು.
ಈ ಅಂತರರಾಷ್ಟ್ರೀಯ ಯೋಗ ಮಹೋತ್ಸವವನ್ನು ಇಂಡಿಯಾ–ಥೈ ಚೇಂಬರ್ ಆಫ್ ಕಾಮರ್ಸ್, ಥೈಲೆಂಡ್, ಗ್ಲೋಬಲ್ ಯೋಗ ಟೀಮ್, ಬೆಂಗಳೂರು, ಡಾ. ದೇವರಾಜ್ ಗುರುಜಿ, ಯೋಗಾಚಾರ್ಯ ಎಸ್.ಎಸ್. ಹಿರೇಮಠ ಗುರುಜಿ, ಹಾಗೂ ಶಿವಾನಂದ ಯೋಗ ಕಾಲೇಜು, ಗದಗ ಅವರ ಸಹಯೋಗದಲ್ಲಿ ಆಯೋಜಿಸಲಾಗಿತ್ತು.
ಕಾರ್ಯಕ್ರಮದಲ್ಲಿ ಥೈಲೆಂಡ್‌ನ ಖ್ಯಾತ ನಟಿ ಮಿಸ್ ಒನಾಸಸಿಪಾಟ್ ಮಾಮೀಕೆಟ್ರಾಟ್ (Miss Onasasipat Mameeketrat) ಅವರು ಎ. ರಾಘವೇಂದ್ರ ಅವರಿಗೆ 'ಯೋಗ ವಾಹಕ' ಪ್ರಶಸ್ತಿ ಪ್ರದಾನ ಮಾಡಿ ಗೌರವಿಸಿದರು. ಪ್ರಶಸ್ತಿ ಸ್ವೀಕರಿಸಿದ ಎ. ರಾಘವೇಂದ್ರ ಅವರು, ಈ ಗೌರವ ಪಡೆಯಲು ಯೋಗಾಚಾರ್ಯ ಎಸ್.ಎಸ್. ಹಿರೇಮಠ ಗುರುಜಿ, ಕೆ. ರಮೇಶ್ ಗುರುಜಿ, ಕೆ. ಚಿಂಬರರಾವ್, ಹರಗಿನದೋಣಿ ಸರ್ಕಾರಿ ಶಾಲೆಯ ಶಿಕ್ಷಕಿ ವನಜಾಕ್ಷಿ ಮ್ಯಾಡಂ, ಯೋಗ ಶಿಕ್ಷಕಿ ಸೌಮ್ಯ, ಹಾಗೂ ಎಸ್‌ಆರ್‌ಕೆ ಯೋಗ ಕೇಂದ್ರದ ಎಲ್ಲಾ ಯೋಗ ಶಿಕ್ಷಕರು, ವಿದ್ಯಾರ್ಥಿಗಳು ಮತ್ತು ಮಕ್ಕಳ ಪ್ರೋತ್ಸಾಹ, ಸಹಕಾರ ಮತ್ತು ಆಶೀರ್ವಾದವೇ ಪ್ರಮುಖ ಕಾರಣವಾಗಿದೆ ಎಂದು ಕೃತಜ್ಞತೆ ಸಲ್ಲಿಸಿದರು.
ಕಾರ್ಯಕ್ರಮದಲ್ಲಿ ಗದಗದ ಯೋಗಾಚಾರ್ಯ ಎಸ್.ಎಸ್. ಹಿರೇಮಠ ಗುರುಜಿ, ಸುನೀಲ್ ಹಿರೇಮಠ, ಬೆಳಗಾವಿಯ ಸಂಗಮೇಶ್, ದಾವಣಗೆರೆಯ ಗಂಗಾಂಬಿಕಾ, ಹಾಗೂ ಕೊಪ್ಪಳ ಜಿಲ್ಲೆಯ ಮರಿಸ್ವಾಮಿ ಕೆ. ಅವರಿಗೂ 'ಯೋಗ ವಾಹಕ' ಪ್ರಶಸ್ತಿ ನೀಡಿ ಗೌರವಿಸಲಾಯಿತು.
ಈ ಸಂದರ್ಭದಲ್ಲಿ ಮಾತನಾಡಿದ ಡಾ. ದೇವರಾಜ್ ಗುರುಜಿ ಹಾಗೂ ಯೋಗಾಚಾರ್ಯ ಎಸ್.ಎಸ್. ಹಿರೇಮಠ ಗುರುಜಿ, "Local to Global – Global to Local" ಪರಿಕಲ್ಪನೆಯಡಿ ಯೋಗವನ್ನು ಪ್ರತಿಯೊಂದು ಹಳ್ಳಿ, ಪಟ್ಟಣ ಹಾಗೂ ನಗರದಿಂದ ವಿಶ್ವದ ಪ್ರತಿಯೊಂದು ದೇಶಕ್ಕೂ ತಲುಪಿಸುವ ಸಂಕಲ್ಪ ಹೊಂದಿದ್ದು, ಇಂತಹ ಅಂತರರಾಷ್ಟ್ರೀಯ ಯೋಗ ಉತ್ಸವಗಳನ್ನು ಪ್ರತಿವರ್ಷ ಆಯೋಜಿಸುವ ಮೂಲಕ ಕರ್ನಾಟಕ ಮತ್ತು ಭಾರತದ ಗ್ರಾಮೀಣ ಭಾಗಗಳ ಯೋಗ ಪ್ರತಿಭೆಗಳನ್ನು ಜಾಗತಿಕ ವೇದಿಕೆಗೆ ಪರಿಚಯಿಸಲಾಗುವುದು ಎಂದು ತಿಳಿಸಿದರು.
ಕಾರ್ಯಕ್ರಮದ ವಿಶೇಷ ಆಕರ್ಷಣೆಯಾಗಿ ಥೈಲೆಂಡ್‌ನ ಯೋಗ ವಿದ್ಯಾರ್ಥಿಗಳು ವಿವಿಧ ಯೋಗಾಸನಗಳು, ಪ್ರಾಣಾಯಾಮ ಹಾಗೂ ಸಮೂಹ ಯೋಗ ಪ್ರದರ್ಶನ ನೀಡಿ ನೆರೆದವರ ಮೆಚ್ಚುಗೆಗೆ ಪಾತ್ರರಾದರು.
ಈ ಅಂತರರಾಷ್ಟ್ರೀಯ ಯೋಗ ಉತ್ಸವವು ಭಾರತ ಮತ್ತು ಥೈಲೆಂಡ್ ನಡುವಿನ ಯೋಗ, ಸಂಸ್ಕೃತಿ, ಆರೋಗ್ಯ ಮತ್ತು ಸ್ನೇಹ ಬಾಂಧವ್ಯವನ್ನು ಮತ್ತಷ್ಟು ಗಟ್ಟಿಗೊಳಿಸುವಲ್ಲಿ ಮಹತ್ವದ ಹೆಜ್ಜೆಯಾಗಿದ್ದು, "ಯೋಗದಿಂದ ವಿಶ್ವಶಾಂತಿ – ಯೋಗದಿಂದ ವಿಶ್ವಬಂಧುತ್ವ" ಎಂಬ ಸಂದೇಶವನ್ನು ವಿಶ್ವದಾದ್ಯಂತ ಸಾರುವಲ್ಲಿ ಯಶಸ್ವಿಯಾಯಿತು.
