ಬಳ್ಳಾರಿ: ಬಳ್ಳಾರಿಯ ಯುವ ಕ್ರಿಕೆಟ್ ಆಟಗಾರ ಅಬ್ದುಲ್ ಹಸನ್ಖಾಲಿದ್ ಅವರು, ಇದೀಗ ಕರ್ನಾಟಕ ಪ್ರೀಮಿಯರ್ ಲೀಗ್ (ಕೆಪಿಎಲ್)ಗೆ ಆಯ್ಕೆಯಾಗಿದ್ದು, ಕೆಪಿಎಲ್ನ ‘ಮಹಾರಾಜ ಟ್ರೋಫಿ ಕ್ರಿಕೆಟ್ ಪಂದ್ಯಾವಳಿಗಳಲ್ಲಿ ಕರ್ನಾಟಕ ತಂಡವನ್ನು ಪ್ರತಿನಿಧಿಸಲಿದ್ದಾರೆ.
ಬಳ್ಳಾರಿಯ ನಂದಿಸ್ಕೂಲ್ ಮತ್ತು ನಂದಿ ಪಿಯು ಕಾಲೇಜ್ನಲ್ಲಿ ವಿದ್ಯಾಭ್ಯಾಸ ಮಾಡುತ್ತಲೇ ಕ್ರಿಕೆಟ್ ಆಟದ ಮೇಲಿನ ಅತೀವ ಆಸಕ್ತಿ, ಅಭಿಯಾನ ಮೈಗೂಡಿಸಿಕೊಂಡು ನಂದಿ ಕ್ರಿಕೆಟರ್ಸ್ನಲ್ಲಿ ಆಡುತ್ತಲೇ ‘ಆಲ್ರೌಂಡರ್ ಆಗಿ ಗುರುತಿಸಿಕೊಂಡು, ತಮ್ಮ ಕ್ರೀಡಾ ಪ್ರತಿಭೆಯಿಂದ ಗಮನ ಸೆಳೆದು ವಿವಿಧ ಕ್ರಿಕೆಟ್ ಟೂರ್ನ್ಮೆಂಟ್ಗಳಲ್ಲಿ ಭಾಗವಹಿಸಿ, ಪ್ರತಿಭೆ ತೋರಿದ್ದಾರೆ.
2014-15ರಲ್ಲಿ 19 ವರ್ಷದೊಳಗಿನವರ ವಲಯ ಕ್ರಿಕೆಟ್ ಟೂರ್ನಿಯಲ್ಲಿ ಹಾಗೂ 19 ವರ್ಷದ ಒಳಗಿನ ಯುವಕರ ವಲಯಮಟ್ಟದ ತಂಡದಲ್ಲಿ 2015 ರಿಂದ 2018ರವರೆಗೆ ಅವಕಾಶ ಪಡೆದು, 2018-19ರಲ್ಲಿ ಅಂಡರ್ 23 ವಲಯ ಮಟ್ಟದ ತಂಡದಲ್ಲಿಯೂ ಆಯ್ಕೆಯಾಗಿ ಹಾಗೂ 2019-20 ರಲ್ಲಿ ಸಿ.ಕೆ.ನಾಯುಡು ಟ್ರೋಫಿ ಪಂದ್ಯಗಳಲ್ಲಿ ಆಯ್ಕೆಯಾಗಿದ್ದಾರೆ.
ವಿಜ್ಜಿ ಟ್ರೋಫಿ ಕ್ರಿಕೆಟ್ ಪಂದ್ಯಾವಳಿಗಳಲ್ಲಿ ಕಳೆದ ವರ್ಷ ದಕ್ಷಿಣ ವಲಯ ತಂಡವನ್ನು ಪ್ರತಿನಿಧಿಸಿ ತಮ್ಮ ಆಕರ್ಷಕ ಆಟದಿಂದಾಗಿ ಗಮನ ಸೆಳೆದಿರುವ ಅಬ್ದುಲ್ ಹಸನ್ ಖಾಲಿದ್ ಅವರು ಉತ್ತಮ ಬ್ಯಾಟಿಂಗ್ ಮತ್ತು ಬೌಲಿಂಗ್ನಿಂದಾಗಿ ‘ಆಲ್ರೌಂಡರ್ ಎಂದು ಗುರುತಿಸಿಕೊಂಡಿದ್ದು, ಇದೀಗ ಕೆಪಿಎಲ್ ಪ್ರೀಮಿಯರ್ ಲೀಗ್ ಟಿ-20 ತಂಡಕ್ಕೂ ಆಯ್ಕೆಯಾಗಿದ್ದಾರೆ. ಬಳ್ಳಾರಿಯ ವಿವಿಧ ಕ್ರೀಡಾ ಸಂಘಗಳು, ಕ್ರಿಕೆಟ್ ತಂಡಗಳು ಇವರಿಗೆ ಶುಭ ಹಾರೈಸಿವೆ.